Türkmen ilim aman bolsun!

Eziz halkym ýalka, Taňrym,
Türkmen ilim aman bolsun!
Topragyma kyldym tagzym
Türkmen ilim aman bolsun!
Tutan ýolum aman bolsun!

Göwün guşdur — göge uçsun,
Her bir raýat bagtyn guçsun,
Berkarardyr puştdan puşdum,
Türkmen ilim aman bolsun!
Bagtyýarlyk ýaran bolsun!

Parlasyn ýaşyl baýdagym,
Ulus-ilimiz baýnasyn,
Çawymyz dünýä ýaýrasyn,
Türkmen ilim aman bolsun!
Mydam altyn zaman bolsun!

Atamyň yhlas edeni,
Pyragyň görmän gideni,
Döretdik erkin Watany
Türkmen ilim aman bolsun!
Ýollarymyz halal bolsun!

Bir ojakdan örsün türkmen,
Şirdir türkmen, ärdir türkmen,
Saňa Hudaý ýardyr türkmen!
Türkmen ilim aman bolsun!
Geljek altyn zaman bolsun!